Søskenfotografering er noko vi har året rundt, vanlegvis i kombinasjon med andre fotograferingar. Ein kan fint ta med søsken på eittårsfotografering, eller når den eine er konfirmant. Det er også fint å kombinere med familiefotografering, men ein kan sjølvsagt også ta ein heil fotograferingsserie berre med søskenbilde. Å fotografere fleire barn under skulealder byr sjølvsagt på nokre utfordringar, men vi har etter kvart lang erfaring med å takle alt frå aktive eittåringar til stae treåringar og sjenerte femåringar. Dei viktigaste råda vi kan gje til dei vaksne er: førebu barnet på at fotografering er noko kjekt, og slapp av sjølv. Dei fleste barn synast det er kjekt å bli tatt bilde av, men vert krava til dei for høge, kan mange reagere med å setje seg på bakbeina. Vi er opne for tøys og moro i studio, og synast vi får dei finaste bilda når barna får vere barn.

Det er lett å gløyme at søsken ikkje berre er småbarn. Vi slår gjerne eit slag for at fleire skal gå til fotografen med barn i småskulealder, for denne tida meiner vi ofte vert gløymd. Då er barna greie å kommunisere med, dei gjer for det meste det vi ber dei om, men dei er framleis fulle av sprell og moro før tenåra - med sine utfordringar - slår til for fullt. Tida går fort, og rekk de ikkje ta bilde før konfirmasjonstida er over dykk, er det ofte neste milepæl mange vel å ta med seg ungdomane sine i studio. Kvar jul har vi også fleire søskenfotograferingar, der vaksne søsken i vidaregåande- og studentalder ønskjer å overraske mor og far med eit nytt og oppdatert søskenbilde. Det er ein kjempeidè, som vi gjerne ønskjer å hjelpe til med å setje ut i live. Vi har ulike løysingar ut ifrå kva budsjett ein ser føre seg, for vi veit at studietida sjeldan tillet dei store investeringane.